მასობრივი კომუნიკაციის დარგში შეიქმნა ახალი პერიოდული სამეცნიერო გამოცემა: „NEXUS - მასობრივი კომუნიკაციისა და სტრატეგიული ნარატივების ჟურნალი“, რომელმაც საქართველოში ორ ათეულ წელზე მეტი ხნის განმავლობაში ამ მიმართულებით არსებული სიცარიელე შეავსო. 2026 წლის პირველი ნომერი დაინტერესებული პირებისთვის უკვე ხელმისაწვდომია როგორც ბეჭდური სახით, ისე — ონლაინფორმატში.
ჟურნალი აერთიანებს აკადემიურ და პრაქტიკულ პერსპექტივებს, აქვეყნებს რეცენზირებად სტატიებს, ანალიტიკურ ნაშრომებსა და კვლევებს, რომლებიც შეეხება მედიის როლს საზოგადოებრივ პროცესებში, დემოკრატიულ განვითარებას, საინფორმაციო უსაფრთხოებას, აუდიტორიის ქცევას და ინოვაციურ კომუნიკაციურ პრაქტიკებს.
მიმდინარე წლის პრიორიტეტულ თემებად წარმოდგენილია: კლიმატგონივრული და აგროსექტორული კომუნიკაციები — მედიის, აგროსექტორისა და გარემოსდაცვითი პოლიტიკის გადაკვეთის საკითხები, კლიმატგონივრული კომუნიკაციის სტრატეგიები, სოფლის განვითარების ნარატივები და ინფორმაციის გავრცელების ეფექტიანი მოდელები.
სამეცნიერო ჟურნალის მხარდამჭერები არიან: ჟურნალისტიკის რესურსცენტრი (JRC), კავკასიის საერთაშორისო უნივერსიტეტი (CIU), შვეიცარიის კომუნიკაციისა და მედიის კვლევების ასოციაცია, საქართველოს მედიაგანათლების ასოციაცია.
„საქართველოს მასობრივი კომუნიკაციის სფერო, წლების განმავლობაში მხოლოდ პრაქტიკული გამოცდილებით საზრდოობდა. არსებულმა დარგობრივმა სამეცნიერო გამოცემებმა, დაახლოებით, ორი ათწლეულის წინ შეწყვიტა ფუნქციონირება. ამიტომაც დღეს განსაკუთრებით მჟღერად გაისმა სიტყვა, რომელიც დიდი ხნის განმავლობაში დუმდა“, — აღნიშნავს სამეცნიერო გამოცემის ერთ-ერთი რედაქტორი, პროფესორი ნინო ჭალაგანიძე. მისი თქმით, ეს არ არის უბრალოდ ახალი ჟურნალი, ესაა სივრცე, სადაც ქართული სამკვლევრო აზრი საბოლოოდ იღებს საერთაშორისო ფორმას.
ნინო ჭალაგანიძე:
„ჩემი კოლეგის, ჟურნალისტისა და პროფესორის ნათია კუპრაშვილისა და ჩემი რედაქტორობით, ასევე, ენერგიული აკადემიური გუნდის ჩართულობით გამოიცა სამეცნიერო ჟურნალი მასობრივ კომუნიკაციაში. „ნექსუსი“ ჩვენს ქვეყანაში მოცემულ ეტაპზე ერთადერთი სამეცნიერო გამოცემაა ამ დარგში.
ეს არ არის უბრალოდ ახალი ჟურნალი. ესაა სივრცე, სადაც ქართული სამკვლევრო აზრი საბოლოოდ იღებს საერთაშორისო ფორმას; სადაც მედია აღარ არის მხოლოდ ინფორმაციის გადაცემის ინსტრუმენტი, არამედ საზოგადოების სარკე, კულტურის შემქმნელი, დემოკრატიის ერთ-ერთი უმნიშვნელოვანესი საყრდენი და სამეცნიერო კვლევის საგანია.
ჟურნალი გამოიცემა ყოველწლიურად — არა რაოდენობისთვის, არამედ ხარისხისთვის. მას აქვს ორმაგი ანონიმური რეცენზირება — რათა მხოლოდ ცოდნის სიღრმემ და მეცნიერულმა მტკიცებულებამ გადაწყვიტოს, რა ნაშრომი დაიმსახურებს გამოქვეყნებას.
ის ინდექსირებულია Google Scholar-ში — რათა ქართველი მკვლევრის ხმა თავისუფლად გავრცელდეს გლობალურ აკადემიურ სივრცეში, იყოს ციტირებადი და შეძლოს განვითარება.
დიახ, ორი ათეული წელია, რაც ახალგაზრდა მკვლევრებს, დოქტორანტებსა და გამოცდილ პროფესორებს არ ჰქონდათ თავიანთი ეროვნული, საერთაშორისო სტანდარტების მქონე ერთიანი დარგობრივი პლატფორმა, სადაც კვლევების წარმოჩენას შეძლებდნენ. დღეს სიცარიელე ივსება, — „ნექსუსი“ ახალი თავია ქართული მასობრივი კომუნიკაციის ისტორიაში.
ეს არის ხიდი პრაქტიკასა და თეორიას შორის; საჩუქარი თაობისთვის, რომელიც იზრდება ციფრული მედიის, ხელოვნური ინტელექტისა და გლობალური ინფორმაციული ომების ეპოქაში და რომელსაც სჭირდება ღრმა, კრიტიკული და მეცნიერული ხედვა.
ვიწვევთ ყველა ქართველ მკვლევარს, ჟურნალისტს, კომუნიკაციის სპეციალისტს, დოქტორანტსა და პროფესორს, რათა ჟურნალი საერთო საქმედ ვაქციოთ. გამოაგზავნეთ თქვენი კვლევები, ანალიზები, თეორიული სტატიები და ემპირიული მასალები“.
დასასრულ, — პროფესორმა ნინო ჭალაგანიძემ კიდევ ერთხელ აღნიშნა, რომ მეცნიერებით გამყარებული სიტყვა არ ქრება, — ის რჩება, ვითარდება და ქმნის მომავალს.
სამეცნიერო გამოცემის რედაქტორი, პროფესორი ნათია კუპრაშვილი ჟურნალის მთავარ მისიას ისეთი სივრცის შექმნაში ხედავს, სადაც მკვლევრები, მედიის პრაქტიკოსები და გადაწყვეტილების მიმღები პირები შეძლებენ იდეების, კვლევებისა და ხედვების გაზიარებას. მას სჯერა, რომ სწორედ ასეთი თანამშრომლობა უწყობს ხელს როგორც აკადემიური დისკურსის გაძლიერებას, ისე — მედიის სფეროს განვითარებას.
ნათია კუპრაშვილი:
„Nexus“ ჩვენთვის მხოლოდ ახალი სამეცნიერო ჟურნალი არ არის — ესაა პლატფორმა, რომელიც აერთიანებს აკადემიურ ცოდნას, პროფესიულ გამოცდილებასა და თანამედროვე მედიის სფეროში არსებულ აქტუალურ გამოწვევებზე მსჯელობას. განსაკუთრებით მნიშვნელოვანია, რომ „Nexus“ არის საქართველოში გამოცემული პირველი სამეცნიერო ჟურნალი მასობრივი კომუნიკაციისა და ჟურნალისტიკის მიმართულებით, რომელიც Google Scholar-ში ინდექსირდა, რაც მნიშვნელოვანი წინგადადგმული ნაბიჯია როგორც თავად გამოცემისთვის, ისე მთლიანად ქართული აკადემიური სივრცისთვის.
კავკასიის საერთაშორისო უნივერსიტეტთან თანამშრომლობით გამოცემული „Nexus“ წარმოადგენს წარმატებულ მაგალითს იმისა, თუ როგორ შეიძლება უმაღლეს საგანმანათლებლო დაწესებულებებსა და დამოუკიდებელ კვლევით ორგანიზაციებს შორის პარტნიორობამ შექმნას მაღალი აკადემიური სტანდარტის პროდუქტი და გახდეს მსგავსი თანამშრომლობის სამომავლო მოდელი საქართველოში“.
საუბრის ბოლოს, - ჩვენმა რესპონდენტმა, პროფესორმა ნათია კუპრაშვილმა ჟურნალის მომავალზე ისაუბრა და აღნიშნა, რომ ის იქნება რეგიონული და საერთაშორისო აკადემიური პლატფორმა, რომელიც ეტაპობრივად გააფართოებს ავტორთა და პარტნიორთა წრეს, მოიზიდავს ახალ კვლევებს და ხელს შეუწყობს თანამედროვე მედიაპროცესების სიღრმისეულ გააზრებას.
ჟურნალის სამეცნიერო კოლეგია:
- ნათია კუპრაშვილი – ასოცირებული პროფესორი, თბილისის სახელმწიფო უნივერსიტეტი, სადოქტორო პროგრამის თანახელმძღვანელი;
- ნინო ჭალაგანიძე – ასოცირებული პროფესორი, თბილისის სახელმწიფო უნივერსიტეტი, სადოქტორო პროგრამის თანახელმძღვანელი;
- SACM-ის (შვეიცარიის კომუნიკაციისა და მედიის კვლევების ასოციაცია) მეცნიერები;
- საქართველოს მედიაგანათლების ასოციაციის წევრი მეცნიერები.
საორგანიზაციო გუნდის წევრები:
- ნინა ხელაძე – პროგრამების ხელმძღვანელი, JRC;
- ირმა ჭარაქაშვილი – მარკეტინგის მენეჯერი, JRC;
- ნუგზარ სუარიძე – ტექნიკური დირექტორი, JRC;
- გიორგი მანთიძე – ციფრული დიზაინერი, JRC;
- სოსო გაზდელიანი – მასობრივი კომუნიკაციის დოქტორი, კავკასიის საერთაშორისო უნივერსიტეტის სოციალურ და ჰუმანიტარულ მეცნიერებათა ფაკულტეტის ასისტენტ-პროფესორი, მულტიმედია ცენტრის კორესპონდენტი;
- ეთიკო შაყულაშვილი – მედიის კვლევებისა და მულტიმედია წარმოების სამაგისტრო პროგრამის სტუდენტი, კავკასიის საერთაშორისო უნივერსიტეტი, მულტიმედია ცენტრის კორესპონდენტი;
- ანუკი წივწივაძე – საზოგადოებასთან ურთიერთობის სამსახურის უფროსი, CIU;
- გიორგი გოგოხია – საზოგადოებასთან ურთიერთობის სამსახურის დიზაინერი, CIU.
სამეცნიერო ჟურნალის ელ. ვერსია შეგიძლიათ, იხილოთ მოცემულ ბმულზე: https://nexus.openjournals.ge/index.php/nexus/issue/view/1119/670
სოსო გაზდელიანი
აპრილი 22, 2026
08:00 AM
