მსოფლიო მედიაბრენდის ლოკალური ბიუროს მაუწყებლობის სპეციფიკა

საერთაშორისო მედიაბრენდის ადგილობრივი ბიურო მნიშვნელოვანი რგოლია, რომელიც ლოკალურ საინფორმაციო სივრცეს გლობალურ ქსელთან აკავშირებს. საერთაშორისო სტანდარტების შესაბამისად, იგი უზრუნველყოფს მოვლენების სანდო, დაბალანსებულ და კონტექსტზე დაფუძნებულ გაშუქებას. ამცირებს ზედაპირული ინტერპრეტაციების რისკს და აძლიერებს მედიისადმი ნდობას.

როგორია მსოფლიო მედიაბრენდის ლოკალური ბიუროს მაუწყებლობის სპეციფიკა და როგორ ადაპტირდა იგი ქართულ მედიასივრცეში, - ამ და სხვა თემებზე ჩვენი რესპონდენტი, Euronews Georgia-ს ჟურნალისტი და წამყვანი, ანა ალელიშვილი გვესაუბრება. 

საერთაშორისო მედიაბრენდის სახელით ოპერირება

მოგეხსენებათ, „ევრონიუს ჯორჯია“ ევროპული euronews-ის პარტნიორია, რომელიც ახალი ამბების ყველაზე რეიტინგული არხია ევროპაში. ოპერირებდე საერთაშორისო მედიაბრენდის სახელწოდებით, უფრო მაღალ პასუხისმგებლობას ნიშნავს. Euronews-თან თანამშრომლობა მოითხოვს არა მხოლოდ ადგილობრივი, არამედ საერთაშორისო სტანდარტების დაცვასაც. 

გარდა იმისა, რომ ჩვენი მასალა უნდა პასუხობდეს მის ძირითად პრინციპებს - სიზუსტეს, მიუკერძოებლობას, ობიექტურობას, რაც, ვფიქრობ, არა მარტო ჩვენი, არამედ, ზოგადად, ჟურნალისტიკის აუცილებელი პირობაა, მაყურებელს უნდა ვთავაზობდეთ მისთვის საინტერესო, აქტუალურ და საჭირო საკითხებსაც.

საერთაშორისო მედიაბრენდის ლოკალური გამოწვევები

ALL VIEWS - ეს ევრონიუსის მთავარი სლოგანია და ჩვენ მიერ მომზადებული ამბებიც, რომლებსაც საზოგადოებას ვუყვებით, აუცილებლად მოითხოვს ბალანსსა და ყველა მოსაზრების გაშუქებას. თითქოს ეს ასეც უნდა იყოს და მედიისთვის აუცილებელი პირობაა, მაგრამ პრაქტიკაში ერთგვარი გამოწვევაცაა, იმუშაო მსგავსი სტანდარტებით. 

საჭიროა ყველა მხარის მოძიება, მათი ინტერესების სწორად გააზრება და პოზიციების თანაბრად წარმოდგენა.  ამბავი მიუკერძოებლად უნდა გაშუქდეს და ყველა მხარის მოსაზრება უნდა ჩანდეს. მას თავისი აუდიტორია ჰყავს, რომელიც ობიექტურ და მშვიდ ტონზე აწყობილ ახალ ამბებს აფასებს.

ადგილობრივი და საერთაშორისო მედიასტანდარტები

მთავარია, რომ ინფორმაცია აუცილებლად იყოს გადამოწმებული, ფაქტებზე დაყრდნობილი, ობიექტური. ჩვენი მიზანია, რომ განსხვავებული მოსაზრებები საზოგადოებას მიუკერძოებლად მივაწოდოთ. თუმცა, ვფიქრობ, ეს არა მარტო ჩვენთვის, ზოგადად, ჟურნალისტიკისთვისაა დამახასიათებელი და ჩვენც ვცდილობთ, ეს პრინციპები დავიცვათ.

როდესაც გადაღებისას ადგილზე ვითარება ძალიან იძაბება, საერთაშორისო სტანდარტების მიხედვით, ვალდებულები ვართ, რაღაც პერიოდით იმ დაძაბულ სიტუაციას ცოტა ხნით მოვშორდეთ და ისე განვაგრძოთ გაშუქება, რადგან, გარე ფაქტორების გამო, შემთხვევით მაუწყებლობა არ შეგვიწყდეს. მნიშვნელოვანია, გვქონდეს უწყვეტი კადრი, რათა მაყურებელს სრული სურათის დანახვის შესაძლებლობა მიეცეს. 

ამბები საქართველოდან და მსოფლიოდან

როდესაც მუშაობ საქართველოში, წარმოუდგენელია გვერდი აუარო ისეთ სოციალურ-პოლიტიკურ საკითხებს, რომლებიც ჩვენს ქვეყანაში ყოველდღიურად ხდება, რაც ხალხს აწუხებს. აქედან გამომდინარე, ყოველთვის მივყვებით ქვეყანაში განვითარებულ აქტუალურ საკითხებს. 

ჩვენს ეთერში მსოფლიოს ამბებსაც საკმაოდ დიდი ადგილი უჭირავს. უცხოეთი ცალკე ბლოკად არ გვაქვს გამოკვეთილი და მსოფლიო ამბები ქართულ ამბებთანაა ინტეგრირებული. 

თანამშრომლობა სხვადასხვა ქვეყნის მედიაბიუროებს შორის

ბიუროებს შორის კომუნიკაცია აქტიურია - ყოფილა შემთხვევები, როდესაც მსოფლიოში მიმდინარე რაიმე მნიშვნელოვან თემასთან დაკავშირებით მათ მოუწოდებიათ მასალა. გარდა ამისა, საქართველოში განვითარებულ პოლიტიკურ მოვლენებთან დაკავშირებით მოგვიმზადებია სიუჟეტი და გაგვიგზავნია ან ჩვენს ჟურნალისტებს ჰქონიათ პირდაპირი ჩართვა სხვადასხვა თემაზე.

მახსენდება ისეთი შემთხვევებიც, როცა ჩვენ მიერ მომზადებული სოციალურ-კულტურული სიუჟეტებით დაინტერესებულან და ეს მასალებიც მიგვიწოდებია.

იდეიდან ეთერამდე

გადაცემების მომზადების პროცესი დილით, ძალიან ადრე იწყება. იგი აერთიანებს როგორც საინფორმაციო გამოშვებას, ისე - სტუმრის ფორმატს.

საინფორმაციო გამოშვებაში თავმოყრილი გვაქვს საქართველოსა და მსოფლიოს ყველა მნიშვნელოვანი ახალი ამბავი. ცხადია, მუშაობის ტემპი ძალიან სწრაფი გვაქვს, რადგან დილის 08:00-საათიანი გამოშვებისთვის ყველაფერი მოვასწროთ. თუმცა, ამავე დროს, ძალიან მნიშვნელოვანია, დავიცვათ სიზუსტე, ობიექტურობა, მიუკერძოებლობა და ჩვენი მაყურებელი, რომელიც გვენდობა, შეცდომაში არ შევიყვანოთ. 

თათბირზე, ჩვენი ნიუსრუმის ხელმძღვანელსა და კონკრეტული გამოშვების პროდიუსერთან ერთად, ყოველთვის ვათანხმებ, რომელი საკითხია განსაკუთრებით აქტუალური, მნიშვნელოვანი, რომ სწორად განვსაზღვრო, რომელი სტუმარი და თემა იქნება რელევანტური. 

როდესაც არხზე ყოველდღიურადაა, სულ მცირე, სამი სტუმარი სხვადასხვა გამოშვებისთვის, საყურადღებოა, რომ თემები არ გამეორდეს და კონკრეტულმა გადაცემამ (დილა/შუადღე/საღამო) თავისი ნიშა არ დაკარგოს. ვფიქრობთ, რა საკითხი აწუხებს საზოგადოებას (ბავშვთა უფლებები, ქალთა მიმართ ძალადობა, ეკოლოგია, საგზაო უსაფრთხოება, ეკონომიკა, სპორტი და ა.შ.). ამ თემატიკიდან გამომდინარე, ვამზადებთ სიუჟეტებს, ხშირად გვაქვს ვოქს-პოპი, რათა ჩვენს ეთერში საზოგადოების ხმა ისმოდეს. თუმცა, ცხადია, არანაკლებ მნიშვნელოვანია ქვეყანაში მიმდინარე პოლიტიკური პროცესები, ამიტომ მასაც, მოვლენების განვითარების შესაბამისად, ყოველდღიურად აქტიურად მივყვებით და ვაშუქებთ. 

რესპონდენტებთან ურთიერთობის სტანდარტი

არიან რესპონდენტები, რომლებიც ინტერვიუებს შეჩვეულნი არიან, კამერის შიში არ აქვთ, შესაბამისად, ეს სატელევიზიო ეთერშიც იგრძნობა. არიან ისეთი რესპონდენტებიც, რომელთა ინტერვიუზე დათანხმებაც ძალიან რთულია. ვფიქრობ, დღეს მოქალაქეების დიდ ნაწილს, სამწუხაროდ, მედიის მიმართ ხშირად უნდობლობა აქვს.

მიმუშავია ძალიან სენსიტიურ თემებზე, ჩამიწერია ოჯახური და სექსუალური ძალადობის მსხვერპლი ქალები. პაციენტები, რომლებიც მძიმე დაავადებას ებრძოდნენ და დაამარცხეს. ასეთი რესპონდენტების ინტერვიუზე დათანხმება განსაკუთრებით რთულია - ზოგჯერ ანონიმურად ჩაწერის წინააღმდეგებიც კი არიან, რადგან ეშინიათ, როგორ გაშუქდება ეს ამბავი, ხომ არ ამოიცნობს მოძალადე მათ ვინაობასა და ადგილსამყოფელს. ხშირად ორჭოფობენ, რადგან ფიქრობენ, რომ მათი სათქმელი დამახინჯდება და არასწორი ინტერპრეტაციით მივა აუდიტორიამდე, შესაბამისად, ცდილობენ, ინტერვიუს თავი აარიდონ. ასეთ დროს განსაკუთრებით მნიშვნელოვანია, რესპონდენტი გენდოს, არ მოატყუო, დაარწმუნო, რომ ფაქტებს არ დაუმახინჯებ. მაგრამ აქვე აუცილებელია, რომ დარწმუნების დროს მათში დამატებითი გაღიზიანება არ გამოიწვიო. ერთგვარი ბეწვის ხიდია გასავლელი. 

ინტერვიუს დაწყებამდე ბევრს ვსაუბრობ მათთან, რაც ჩვენ შორის კეთილგანწყობას აყალიბებს, შედეგად, უფრო იხსნებიან და თავისუფლად საუბრობენ. ვფიქრობ, მნიშვნელოვანია, მათი ნდობის მოპოვება და, ცხადია, შემდეგ მოტყუებული არ უნდა დარჩეს. მიხარია, რომ ჩემ მიერ მომზადებული ბევრი სიუჟეტის გასვლის შემდეგ რესპონდენტების მადლობის წერილი მიმიღია.

საგანგებო ეთერში მუშაობის სპეციფიკა

საგანგებო ეთერის დროს აუცილებელია, მაყურებელს სწრაფად მივაწოდოთ ინფორმაცია, მაგრამ ამ სისწრაფეში შეცდომა არ უნდა გაიპაროს. მასალას ოპერატიულად, თუმცა ძალიან ბევრჯერ ვამოწმებთ, რომ მაყურებელს უტყუარი, ფაქტებზე დაფუძნებული ინფორმაცია მივაწოდოთ. არანაკლებ მნიშვნელოვანია ემოციის გაკონტროლება, სიმშვიდის შენარჩუნება, რომ საზოგადოებაში პანიკა არ დავთესოთ და მაყურებელი არ შევაშინოთ.

როცა ქვეყანაში/მსოფლიოში საგანგებო მდგომარეობაა, ეს, ცხადია, ყველა ადამიანზე განსხვავებულად აისახება - ჟურნალისტიც ჩვეულებრივი ადამიანია, რომელიც რაღაც მოვლენას შესაძლოა, მეტად მძაფრად ან ემოციურად აღიქვამდეს. ემოციის გაკონტროლება რეალობის სწორად აღქმაში, რისკების შეფასებაში გვეხმარება.

რჩევები მომავალი ჟურნალისტებისთვის

პირველ რიგში, ვფიქრობ, უნდა გვახსოვდეს, რომ მთავარია ჟურნალისტური ეთიკის სტანდარტების დაცვა. მომავალ ჟურნალისტებს ვურჩევდი, არასდროს დაიღალონ შრომით, მუდმივი განვითარების სურვილით. ყოველთვის ახსოვდეთ თავიანთი პასუხისმგებლობა, ობიექტურობა, ეთიკა და ის, რომ მნიშვნელოვანია, ყველა მოსაზრება ისმოდეს ეთერში. 

ჟურნალისტიკა, ვფიქრობ, მრავალმხრივი სფეროა, რომელიც სხვადასხვა თემაში კარგად გარკვევას გულისხმობს. ვერ დაიწყებ კონკრეტულ სიუჟეტზე მუშაობას, თუ საკითხი თავად არ იცი კარგად. 

საუბრის ბოლოს, - ჩვენმა რესპონდენტმა კიდევ ერთხელ აღნიშნა, რომ პროფესიული წარმატება მუდმივი განვითარების სურვილით იწყება. 

სოსო გაზდელიანი