რატომ უნდა აირჩიოთ CIU-ს საბაკალავრო პროგრამა ჟურნალისტიკაში?

კავკასიის საერთაშორისო უნივერსიტეტში ჟურნალისტიკის საბაკალავრო საგანმანათლებლო პროგრამა 2012-2013 სასწავლო წლიდან სოციალურ მეცნიერებათა ფაკულტეტზე ხორციელდება. პროგრამა გამორჩეულია პრაქტიკაზე ორიენტირებული სწავლებით. სტუდენტებს საშუალება აქვთ, დაეუფლონ თანამედროვე ჟურნალისტიკის ყველა პრაქტიკულ თუ თეორიულ ასპექტს.

როგორც კავკასიის საერთაშორისო უნივერსიტეტის ჟურნალისტიკის საბაკალავრო საგანმანათლებლო პროგრამის ხელმძღვანელი და ამავე უნივერსიტეტის პროფესორი, ზაზა ცოტნიაშვილი განმარტავს, მათი უმთავრესი ამოცანა პროფესიონალი და ეთიკური სპეციალისტის მომზადებაა, რომელსაც ექნება უნარი, დასაქმდეს თანამედროვე გამოწვევებისა და მედიაბაზრის მოთხოვნების შესაბამისად. ამასთან, ზაზა ცოტნიაშვილი აღნიშნავს, რომ თანამედროვე გამოწვევების გათვალისწინებით, პროგრამის განვითარებისას ძირითადი აქცენტი ციფრულ ტექნოლოგიებზე კეთდება.

„ჟურნალისტიკის საბაკალავრო პროგრამის შიგთავსი პერიოდულ განახლებას ექვემდებარება და ვფიქრობ, ეს დროის გამოწვევაა. გამუდმებით ვცდილობთ, პროგრამა ისეთი სასწავლო კურსებით დავაკომპლექტოთ, რომლებიც, ერთი მხრივ, შინაარსობრივ ურთიერთკავშირში იქნება, მეორე მხრივ კი, მოამზადებს დასაქმებაზე ორიენტირებულ კურსდამთავრებულს.

ჩვენი მიზანია, მომავალ ჟურნალისტს მულტიმედიური უნარები შევძინოთ, რათა შემდგომში თავისუფლად შეძლოს მისთვის საინტერესო მედიაპლატფორმაზე დასაქმება. შეიძლება ითქვას, კსუ-ს ჟურნალისტიკის საბაკალავრო პროგრამის კურსდამთავრებული მულტიმედიურ გარემოში კარგად ადაპტირებული და მედიაბაზარზე კონკურენტუნარიანი კადრია.

ჩვენ აქტიურად ვთანამშრომლობთ პროგრამის აკადემიურ პერსონალთან, ხარისხის განვითარების სამსახურთან, გვაქვს საერთაშორისო მოლაპარაკებები და ამ კუთხით, სწორედ ახლა ვაფორმებთ მემორანდუმს ავსტრიის „გრაცის უნივერსიტეტთან“ მულტიმედიის მიმართულებით, რაც ჩვენს სტუდენტებს შესაძლებლობას მისცემს, უფასოდ მიიღონ მონაწილეობა გაცვლით პროგრამაში. ეს ურთიერთობა ორ პროგრამას შორის თავსებადობას შეუწყობს ხელს: ყველა იმ ევროპულ კურსს, რომელიც საერთაშორისო დასაქმებაზეა ორიენტირებული, ჩვენთანაც შემოვიღებთ. ამასთან, სტუდენტებს საერთაშორისო დონეზე აქტიური ურთიერთთანამშრომლობის საშუალება ექნებათ, რაც ძალიან მნიშვნელოვანია“, - აღნიშნა ზაზა ცოტნიაშვილმა.

კსუ-ს ჟურნალისტიკის საბაკალავრო საგანმანათლებლო პროგრამის დამამთავრებელი კურსის სტუდენტი, ნანო ნარსია იმ პერიოდს იხსენებს, როდესაც თავისი პროფესიული განვითარება კავკასიის საერთაშორისო უნივერსიტეტს მიანდო. როგორც ნანომ აღნიშნა, ჩაბარების შემდეგ მისი მოლოდინები გამართლდა.

„ჟურნალისტობა ბავშვობიდან მინდოდა. პროფესიის არჩევისას ბევრი არ მიფიქრია. ჯერ კიდევ აბიტურიენტობისას გადაწყვეტილი მქონდა, სად და რატომ ვაბარებდი. ცხადია, უმაღლესი სასწავლებლის შერჩევამდე, ვაგროვებდი ინფორმაციებს და ვაკეთებდი გათვლებს - რომელი უნივერსიტეტი რა შესაძლებლობებს მომცემდა. ჩემი არჩევანი კავკასიის საერთაშორისო უნივერსიტეტზე შეჩერდა, რადგან ზუსტად ვიცოდი, აქ, თეორიულ ცოდნასთან ერთად, ძალიან დიდ პრაქტიკულ გამოცდილებასაც მივიღებდი.

ჩემი არჩევანი იმ ფაქტმაც განამტკიცა, რომ უნივერსიტეტში ფუნქციონირებს მულტიმედია ცენტრი, რომლის მატერიალურ-ტექნიკური მხარდაჭერით, ჩვენ პროფესიონალებად ვყალიბდებით. ვფიქრობ, ამ პროფესიაში, თეორიული ბაზისის გარდა, მნიშვნელოვანია პრაქტიკის სრულყოფილად გავლა. კავკასიის საერთაშორისო უნივერსიტეტში კი სწავლების თითოეული კომპონენტი მიმართულია იქითკენ, რომ სასწავლებელშივე გამოვიმუშაოთ მულტიმედიური უნარები. აქ გვასწავლიან ყველაფერს, რაც ჟურნალისტს თავის პროფესიულ ცხოვრებაში აუცილებლად გამოადგება და ამაში უფრო და უფრო ვრწმუნდები“, - აღნიშნა ნანო ნარსიამ.

კავკასიის საერთაშორისო უნივერსიტეტის ბაზაზე რამდენიმე წელია, მულტიმედია ცენტრი, თავისი სივრცითა და მატერიალურ-ტექნიკური საშუალებებით, წარმატებით ფუნქციონირებს. ცენტრი სტუდენტებს პრაქტიკის სრულფასოვნად გავლის შესაძლებლობას აძლევს. თემაზე უფრო ვრცლად კსუ-ს მულტიმედია ცენტრის ხელმძღვანელი, პროფესორი ნინო ჭალაგანიძე გვესაუბრება.

„კსუ მულტიმედია ცენტრი არის უახლესი აპარატურით აღჭურვილი ინოვაციური სივრცე, რომელიც სარედაქციო და ტექნიკურ ნაწილს აერთიანებს. რედაქციები, სატელევიზიო და ხმის ჩამწერი სტუდიები, სამონტაჟო კაბინეტები, სარეჟისორო, საგრიმიორო, - ყველაფერი ისეა მოწყობილი, რომ სტუდენტმა თავიდანვე იგრძნოს რეალური სარედაქციო გარემო და რიტმი. საწყის ეტაპზე სტუდენტებს ეხმარებიან როგორც პროფესორ-მასწავლებლები, ისე ტექნიკური პერსონალი. საბაზისო უნარების დაუფლების შემდეგ კი ახალგაზრდები მულტიმედიურ მასალებს უკვე სრულიად დამოუკიდებლად, თავად აწარმოებენ. ცენტრის ტექნიკური რესურსი საშუალებას იძლევა, სტუდენტებმა იმუშაონ როგორც პირდაპირი ეთერის რეჟიმში (ფუნქციონირებს სარეჟისორო პულტი, განათების უახლესი დანადგარები, სტუდიური და გარე-გადაღების კამერები და სხვ.), ასევე, ჩაწერონ და ვებგვერდზე განათავსონ თოქ-შოუები და გადაცემები. ცენტრის ტექნიკური რესურსი საშუალებას იძლევა, სტუდენტების მიერ შემოთავაზებულ ნებისმიერ საინტერესო ინიციატივას მხარი დავუჭიროთ და მათი იდეები უმალ ვაქციოთ მულტიმედიურ პროდუქტად.

კავკასიის საერთაშორისო უნივერსიტეტის მულტიმედია ცენტრი ის უნიკალური სივრცეა, სადაც საქმიანობა ორი ძირითადი მიმართულებით წარიმართება: ერთი მხრივ, ესაა მომავალი ჟურნალისტების დახელოვნებისთვის პრაქტიკული ბაზა, ხოლო მეორე მხრივ, მოქმედი ჟურნალისტების, ჩვენს შემთხვევაში, პროფესორ-მასწავლებლებისა და სწავლების პროცესში ჩართული პერსონალისთვის თვითგამოვლენის, საკუთარი შესაძლებლობების განვითარების, მათი ახალი იდეების გენერირებისა და პრაქტიკაში ხორცშესხმის ადგილი. ცენტრის საქმიანობა მრავალმხრივია როგორც ფორმის, ისე - შინაარსის მიხედვით. შერწყმული სარედაქციო საქმიანობა თანამედროვეობის გამოწვევაა: გაზეთი, ჟურნალი, პოდკასტები, ტელე და რადიომასალები, დოკუმენტალისტიკა, ფოტო, ციფრული მედია და ბლოგები ასახავს ჩვენს შემოქმედებას. ასევე, მრავალმხრივია თემატური ველი: ადამიანის უფლებებიდან ვიდრე ეკოლოგიურ მდგომარეობამდე, კულტურა, ეკონომიკა, სოციალური პრობლემატიკა და ყველა ის საკითხი, რომელიც შეიძლება სტუდენტმა და პროფესორმა აქტუალურად მიიჩნიოს, მულტიმედია ცენტრის ფოკუსში ექცევა.

ბოლო პერიოდში განსაკუთრებით აქტუალური გახდა მედიალოგიის თემატიკა: მედიის განვითარება არამხოლოდ ჟურნალისტების ინტერესის საგანია, უპირველესად, ეს საზოგადოების დაკვეთაა. თავისუფალი, პროფესიული სტანდარტების შესაბამისი და ეთიკური ღირებულებების მქონე მედია დემოკრატიული სახელმწიფოს საფუძველიცაა და მისი სიძლიერის გარანტორიც. სწორედ ამიტომ, გარდა იმისა, რომ ცენტრის თანამშრომლები მუდმივად აშუქებენ აღნიშნულ საკითხებს, ასევე პერმანენტულად ეწყობა სხვადასხვა ტიპის დარგობრივი ფორუმები და კონფერენციები“, - აღნიშნა ნინო ჭალაგანიძემ.

კავკასიის საერთაშორისო უნივერსიტეტის მულტიმედია ცენტრი ღია პლატფორმაა, რომელიც არამხოლოდ სტუდენტებისთვის, არამედ დარგით დაინტერესებული ყველა ადამიანისთვის სასარგებლო და აქტუალური ინფორმაციის მიწოდებაზე, მის განათლებასა და განვითარებაზეა ორიენტირებული.

სოსო გაზდელიანი