კულინარია სატელევიზიო წესებით

კულინარია ტელეეთერში უკვე დიდი ხანია, გასცდა მხოლოდ რეცეპტების გაცვლის ფორმატს. დღეს ის მაყურებელთან კომუნიკაციის ერთ-ერთი ყველაზე ცოცხალი და მრავალფეროვანი საშუალებაა, სადაც პრაქტიკული ინფორმაცია, ვიზუალური ესთეტიკა და ემოციური განწყობა ერთიანდება.

 

კულინარიული რუბრიკა ერთდროულად უნდა იყოს პრაქტიკული, დინამიკური და ვიზუალურად მიმზიდველი. რამდენიმე წუთში უნდა გაჩნდეს ნდობა, ინტერესი და განცდა, რომ ეკრანზე ნაჩვენები კერძი არა მხოლოდ ლამაზად გამოიყურება, არამედ რეალურად შესაძლებელია მისი მომზადება ყოველდღიურ პირობებშიც. სწორედ ამიტომ, ამ ფორმატის წარმატებას მხოლოდ რეცეპტი არ განსაზღვრავს - მას ქმნის სწორად შერჩეული თემა, ეთერის რიტმი, წამყვანის კომუნიკაციის სტილი და ის ატმოსფერო, რომელიც მაყურებელს ეკრანთან აკავებს.

რა დგას ერთი შეხედვით მარტივი კულინარიული რუბრიკის მიღმა, როგორ იქმნება მისი კონცეფცია, რა განსაზღვრავს წარმატებულ ეთერს და რატომ აქვს ამ ფორმატს განსაკუთრებული ადგილი დილის გადაცემაში, - ამ თემებზე „დილა მშვიდობისა საქართველოს“ კულინარიული რუბრიკის წამყვანი ლიკა კვარაცხელია გვესაუბრება.

 

კულინარია მედიაში...

კულინარიული რუბრიკის როლსა და ადგილს საერთო კონცეფციაში, როგორც წესი, გადაცემის პროდიუსერები განსაზღვრავენ. ჩემი მხრიდან კი ვცდილობ, რომ კონტენტი იყოს მსუბუქი, პრაქტიკული, რათა ის მაყურებელს დღის სასიამოვნო განწყობით დაწყებაში დაეხმაროს.

ვცდილობ, შევარჩიო მარტივი, საინტერესო და ყოველდღიურ ცხოვრებაში გამოსადეგი რეცეპტები, რომლებიც ხელმისაწვდომი პროდუქტებით მზადდება. რეცეპტის პარალელურად, ყოველთვის ვუზიარებ მაყურებელს პატარა კულინარიულ რჩევებსა და ხრიკებს, რომლებიც მომზადების პროცესს კიდევ უფრო ამარტივებს.

 

სეზონურობა თემატიკაში...

თემატიკის მხრივ, უმეტესად, სეზონურობას ვითვალისწინებ, - შესაფერის დროს შესაბამისი კერძი. ვცდილობ, გავითვალისწინო მაყურებელთა ინტერესებიც.

მე ყოველთვის იმას ვამზადებ, რასაც რეალურად თავადაც მივირთმევ, შესაბამისად, სხვებსაც სიამოვნებით ვუზიარებ.

 

გემოსა და ტემპის ბალანსი ეთერში...

ყველაზე დიდი გამოწვევა დროის სწორად მართვაა. ზოგი კერძი ოც წუთში მზადდება, ზოგს კი რამდენიმე საათი სჭირდება. ასეთ პირობებში საჭიროა, მთელი პროცესი ისე დაიგეგმოს, რომ მაყურებელი მომზადების ყველა მნიშვნელოვან ეტაპს მოკლე დროში, გასაგებად და დინამიკურად გაეცნოს, განსაკუთრებით - პირდაპირ ეთერში.

 

მთავარია, დაიწყო...

რაც შეეხება მათ, ვინც კულინარიული კონტენტის შექმნითაა დაინტერესებული, ვურჩევ, არ შეეშინდეთ პირველი ნაბიჯის გადადგმის. მთავარია, დაიწყოთ, შემდეგ კი გამოცდილება და თავად პროცესი გაჩვენებთ, რა ფორმატი და მიმართულებაა თქვენთვის ყველაზე საინტერესო და წარმატებული.

 

საუბრის ბოლოს, - ჩვენმა რესპონდენტმა, ლიკა კვარაცხელიამ ეთერში გულწრფელობისა და ბუნებრიობის მნიშვნელობას კიდევ ერთხელ გაუსვა ხაზი და აღნიშნა, რომ ამას მაყურებელი ძალიან კარგად გრძნობს.

 

სოსო გაზდელიანი

ეთიკო შაყულაშვილი