CIU მულტიმედია ცენტრში ჟურნალისტებისთვის საჯარო ლექცია გაიმართა

20 ნოემბერს კავკასიის საერთაშორისო უნივერსიტეტის მულტიმედია ცენტრში, ჟურნალისტიკის პროგრამის სტუდენტებისთვის საჯარო ლექცია გაიმართა. შეხვედრის მთავარი თემა: სატელევიზიო გადაცემა „დოსიეს“ დაარსება და განვითარება იყო. ღონისძიებას აღნიშნული გადაცემის წამყვანი, მწერალი და დოკუმენტალისტი, პაატა ქურდაძე უძღვებოდა.

სტუმარმა დოკუმენტური ფილმის მნიშვნელობაზე ისაუბრა და აღნიშნა, რომ ეს არის წიგნი მოძრავი ილუსტრაციებით, რომელიც რეალობის შემეცნების ერთ-ერთი საუკეთესო საშუალებაა.

პროფესორმა ზაზა ცოტნიაშვილმა შეხვედრის მნიშვნელობაზე პროგრამის განვითარების კონტექსტში ისაუბრა და აღნიშნა, რომ მსგავსი ტიპის საჯარო ლექციები მომავალი ჟურნალისტებისთვის გამოცდილების გაზიარების საუკეთესო საშუალებაა.

გადაცემა „დოსიე“ დოკუმენტურ ჟანრში გაცოცხლებული სხვადასხვა ეპოქისა და ქვეყნის პოლიტიკური, კულტურული, სოციალური ცხოვრების მნიშვნელოვანი ეპიზოდების ერთგვარი ტელე-ვიდეოთეკაა.