ვორქშოპი აბიტურიენტებისთვის კსუ მულტიმედია ცენტრში

„CIU მედიასკოლის“ პროექტის ფარგლებში, პირველ აპრილს კავკასიის საერთაშორისო უნივერსიტეტის მულტიმედია ცენტრში აბიტურიენტებთან მორიგი შეხვედრა გაიმართა.

სხვადასხვა სკოლის დამამთავრებელი კლასის მოსწავლეებს კსუ მულტიმედია ცენტრის პროდიუსერმა, კსუ-ს ასოცირებულმა პროფესორმა, რუსუდან კვარაცხელიამ უმასპინძლა. შეხვედრის მთავარი თემა იყო: ფოტორეპორტიორი - ჟურნალისტური პროფესია.

ვორქშოპი ითვალისწინებდა როგორც თეორიულ, ისე პრაქტიკულ სწავლებას. შეხვედრაზე შემდეგი საკითხები განიხილეს: ვიზუალური კონტენტი თანამედროვე მასმედიაში; ფოტო და ვიდეო, როგორც დამოუკიდებელი და თანმხლები ერთეული მასმედიაში; პრაქტიკული ნაწილის მნიშვნელობა პროფესიის ათვისების სასწავლო პროცესში; სხვაობა პროფესიულსა და მოყვარულ ფოტონამუშევრებს შორის; ბენეფიციართა ფოტონამუშევრების გარჩევა.

„CIU მედიასკოლა“ კავკასიის საერთაშორისო უნივერსიტეტის მულტიმედია ცენტრის ახალი პროექტია, რომელიც ჟურნალისტიკით დაინტერესებულ აბიტურიენტებს აწვდის ზოგად ცოდნას ჟურნალისტიკის სფეროს შესახებ, ასევე, აცნობს მათ პროფესიაში არსებულ გამოწვევებსა და შესაძლებლობებს.