კავკასიის საერთაშორისო უნივერსიტეტის მულტიმედია ცენტრს შოტლანდიელი მედიაექსპერტი, სტერლინგის უნივერსიტეტის პროფესორი, ადრიან ჰედლანდი ესტუმრა. ის დეტალურად გაეცნო CIU მულტიმედია ცენტრის მუშაობის სპეციფიკას, მოინახულა ტელე და რადიოსტუდიები.
გთავაზობთ ინტერვიუს შოტლანდიელ მედიაექსპერტთან.
მედიაგანათლების მნიშვნელობა თანამედროვე სამყაროში
მედიაგანათლება ძალიან მნიშვნელოვანია. დღეს, თანამედროვე სამყაროში, თითქმის ყველა კომპანია დაკავებულია საგამომცემლო საქმიანობით. მათ სჭირდებათ ინფორმაცია, ფოტოები, პრესრელიზები და მასალები თავიანთი ვებგვერდისთვის. ასწავლო ახალგაზრდებს ამ საქმის კეთება, ძალიან მნიშვნელოვანი და საჭიროა.
მედიაგანათლების ქართული და უცხოური სისტემა - გამოწვევები
გასულ წელს საქართველოს ოთხ უნივერსიტეტში ვიმყოფებოდი, რათა მათი მედიაპროგრამები შემესწავლა. მინდა გითხრათ, რომ ჩემზე დიდი შთაბეჭდილება მოახდინა აქაურმა გარემომ: ტექნოლოგიებმა, სტუდენტებმა, იმ სამუშაომ, რასაც ისინი ასრულებენ, ასევე, სწავლების მეთოდებმა. თუმცა, ქართული მედიასფეროც ისეთივე გამოწვევების წინაშე დგას, როგორშიც ჩვენც ვართ გაერთიანებულ სამეფოსა და აშშ-ში. ვცდილობთ, ფეხი ავუწყოთ ტექნოლოგიურ ცვლილებებს, გავუმკლავდეთ ეთიკურ დილემებს, ყალბ ახალ ამბებს, პროპაგანდას. ეს ის საკითხებია, რომლებიც გარკვეულ სირთულეს წარმოადგენს როგორც თქვენთვის - საქართველოსთვის, ასევე ჩვენთვის - გაერთიანებული სამეფოსათვისაც.
ბალანსი თეორიულ და პრაქტიკულ სწავლებას შორის
მიმაჩნია, რომ უნდა იყოს გარკვეული ბალანსი დემოკრატიასთან მიმართებით, ერთი მხრივ, ჟურნალისტიკის როლის სწორ თეორიულ გაგებასა და თავად მედიის არსს შორის, მეორე მხრივ კი, პრაქტიკულ გამოცდილებასა და საჭირო პროფესიულ უნარ-ჩვევებს შორის. სტუდენტებსა და დამსაქმებლებს უყვართ ტექნიკასთან მუშაობა, პრაქტიკული სამუშაოს შესრულება, რაც მნიშვნელოვანია, მაგრამ ასევე ძალიან მნიშვნელოვანია, რომ მათ ჰქონდეთ ანალიტიკური და კრიტიკული აზროვნების უნარი, კარგად ესმოდეთ გლობალური და ლოკალური სისტემა, იცნობდნენ ჟურნალისტიკის წინაშე მდგარ გამოწვევებსა და პრობლემებს თანამედროვე ციფრულ ეპოქაში. ამრიგად, ბალანსი აუცილებელია. ზოგჯერ თეორია სჭარბობს პრაქტიკას, ზოგჯერ კი პირიქით. მედიასკოლები ცდილობენ, ამ ორ კატეგორიას შორის სწორი ბალანსი დაიჭირონ, ხშირად ეს პედაგოგებზეცაა დამოკიდებული, რადგან მათ ხშირად უფრო მეტი თეორიული ცოდნა ან პრაქტიკული გამოცდილება აქვთ. სწორი ბალანსის პოვნა სირთულეს წარმოადგენს.
გარემო პროფესიული საქმიანობის განსახორციელებლად
ბევრ სხვადასხვა გარემოში ვყოფილვარ: ვიყავი კორესპონდენტი ომში, რეპორტიორი ექსტრემალურ სიტუაციებში. ასეთ დროს შენი მედიაორგანიზაციიდან მხარდაჭერას ძალიან დიდი მნიშვნელობა აქვს. ცოდნა და უნარები, რომლებსაც წლების განმავლობაში აგროვებ და გამოიმუშავებ ასევე ძალიან გამოსადეგია. საჭიროა, წინასწარ იყო მომზადებული, რათა შენი, როგორც რეპორტიორის მოვალეობა კარგად შეასრულო იმ გარემოში, სადაც ხარ.
რჩევები ჟურნალისტისგან ჟურნალისტებს
თუკი აპირებთ რეპორტაჟების გაკეთებას, თქვენ უნდა ჩაატაროთ დიდი კვლევა, გაესაუბროთ ბევრ ადამიანს, კარგად უნდა იცნობდეთ იმ გარემოსა და საზოგადოებას, სადაც მუშაობა გიწევთ. ამგვარად, მოსამზადებელი კვლევა ძალიან მნიშვნელოვანია, მაგრამ საბოლოო შედეგის წარდგენამდეც დარწმუნდით, რომ ყველაფერი, რასაც წერთ, სწორი და დაბალანსებულია. ეცადეთ, იყოთ სამართლიანები და გაწონასწორებულები ამბის ყველა მხარის მიმართ, ეს მიდგომა პროფესიულ შეცდომებს თავიდან აგარიდებთ. ჩვენ, ჟურნალისტები მთხრობელები ვართ, ვყვებით ამბავს და ეს უნდა გავაკეთოთ დაბალანსებულად.
ვიზიტი CIU-ში
კავკასიის საერთაშორისო უნივერსიტეტში პირველად ვარ, ჩემთვის სასიამოვნოა აქ ყოფნა. ბევრი მსმენია თქვენი უნივერსიტეტის შესახებ. ვფიქრობ, სამომავლოდ ჩვენს უმაღლეს საგანმანათლებლო დაწესებულებებს შორის მჭიდრო კავშირი ჩამოყალიბდება.
ადრიან ჰედლანდი მსოფლიოს სხვადასხვა ქვეყანაში 15 წელზე მეტი ხნის განმავლობაში პრაქტიკოს ჟურნალისტად მუშაობდა. ის ნელსონ მანდელამ სამხრეთ აფრიკაში პოლიტიკური ამბების მთავარ გამშუქებლად მიიწვია და რამდენიმე წელი იქ მოღვაწეობდა. არის 17 წიგნისა და არაერთი სამეცნიერო სტატიის ავტორი.