დენის მეტსონისა და ზაზა ცოტნიაშვილის ერთობლივი ლექცია კსუ-ს მედიის კვლევების მაგისტრანტებთან

29 აპრილს კავკასიის საერთაშორისო უნივერსიტეტის მედიის კვლევებისა და მულტიმედია წარმოების სამაგისტრო საგანმანათლებლო პროგრამის მაგისტრანტებს, სასწავლო კურსის „საინფორმაციო სტრატეგიები“ ფარგლებში, ამავე საგნის ხელმძღვანელმა, კსუ-ს პროფესორმა, ზაზა ცოტნიაშვილმა და ჩიკაგოს დე პოლის უნივერსიტეტის წარმომადგენელმა, დენის მეტსონმა ერთობლივი ლექცია შესთავაზეს. შეხვედრა ონლაინფორმატში წარიმართა.

როგორც კსუ-ს მედიის კვლევებისა და მულტიმედია წარმოების სამაგისტრო პროგრამის ხელმძღვანელმა, ზაზა ცოტნიაშვილმა აღნიშნა, მსგავსი ფორმატის ლექცია განათლების ინტერნაციონალიზაციას ემსახურებოდა. მისივე განმარტებით, საერთაშორისო თანამშრომლობა კვლავ გაგრძელდება და მსგავსი ტიპის აქტივობები პერმანენტულ ხასიათს მიიღებს.

დენის მეტსონმა, თავდაპირველად, ჩიკაგოს დე პოლის უნივერსიტეტის ჟურნალისტიკის პროგრამის შიდა სამზარეულოზე ისაუბრა და შეხვედრის მონაწილეებს ამ მიმართულებით საუკეთესო გამოცდილება გაუზიარა. როგორც მეტსონმა აღნიშნა, ჟურნალისტიკის სრულყოფილად დასაუფლებლად თეორიული და პრაქტიკული ცოდნა თანაბრად მნიშვნელოვანია. სწორედ ამიტომ, დე პოლის უნივერსიტეტში ორივე კომპონენტს დიდი ყურადღება ექცევა.

შეხვედრის მეორე ნაწილში მეტსონმა სტრატეგიული საინფორმაციო პოლიტიკის ეფექტური წარმართვის მნიშვნელობაზე ისაუბრა და ამ კუთხით, მაგისტრანტებს თავისი გამოცდილება გაუზიარა. მან ასევე ეთიკური ჟურნალისტიკის პრობლემებზე, პოლარიზებულ მედიასაშაულებებსა და საინფორმაციო მანიპულაციაზე ისაუბრა და განმარტა, რომ ამ მიმართულებით მდგომარეობა არც ისე სახარბიელოა.

დენის მეტსონმა საინფორმაციო მანიპულაციებთან დაკავშირებითაც ისაუბრა და ამ მიმართულებით აშშ-ის 2020 წლის არჩევნები მიმოიხილა. მან ასევე ყურადღება გაამახვილა ამერიკულ მედიასაშუალებებში არსებულ პრობლემებსა და გამოწვევებზე.

„აღფრთოვანებული დავრჩი კსუ-ს მაგისტრანტებთან შეხვედრით. მათგან წამოსული შეკითხვები აჩვენებდა საერთაშორისო ასპარეზზე მათ მნიშვნელოვან ინფორმირებულობას. კომუნიკაციების სფეროში მათ დიდი მომავალი აქვთ!“ - აღნიშნა დენის მეტსონმა შეხვედრის შემდეგ.

კომბინირებული ლექცია, დაახლოებით, ერთი საათი გაგრძელდა და ინტერაქტიურ ფორმატში წარიმართა. კსუ-ს მაგისტრანტებმა გამომსვლელს თემატური კითხვები დაუსვეს და მისგან ამომწურავი პასუხები მიიღეს. მათი შეფასებით, საინტერესო კოლაბორაცია შედგა და იმედი გამოთქვეს, რომ მსგავსი პრაქტიკა სამომავლოდაც გაგრძელდება.

სოსო გაზდელიანი