„დასავლური და აღმოსავლური თანამედროვე მედიის გამოწვევები“ - ამ სახელწოდებით 5 მაისს ქალაქ სტამბულში (თურქეთი) სამეცნიერო სემინარი ჩატარდა.
პროექტი კავკასიის საერთაშორისო უნივერსიტეტის დოქტორანტურის სამსახურისა და სოციალურ მეცნიერებათა ფაკულტეტის ორგანიზებით, კანცლერის, ვახტანგ წივწივაძის თანადაფინანსებით განხორციელდა.
სამეცნიერო სემინარში მონაწილეობა კავკასიის საერთაშორისო უნივერსიტეტის მასობრივი კომუნიკაციის სადოქტორო საგანმანათლებლო პროგრამის დოქტორანტებმა მიიღეს. ისინი, ინდივიდუალურად, სადისერტაციო თემატიკიდან გამომდინარე, მედიის კონკრეტულ როლსა და მნიშვნელობაზე, მის დასავლურ და აღმოსავლურ მახასიათებლებზე სასაუბროდ მოხსენებით წარდგნენ, რის შემდეგაც, მრგვალი მაგიდის ფორმატში, დისკუსიები გაიმართა.
სამეცნიერო სემინარი CIU-ს დოქტორანტურის სამსახურის ხელმძღვანელმა, ნინო მინდიაშვილმა გახსნა. როგორც მან ჩვენთან ინტერვიუში აღნიშნა, მსგავსი პროექტები მომავალშიც აქტიურად გაგრძელდება და მასში სხვა სადოქტორო პროგრამებიც ჩაერთვება.
„დოქტორანტთა სამეცნიერო საგანმანათლებლო-შემეცნებითი ტურები დოქტორანტურის სამსახურის ინოვაციური პროექტია, რომელიც სოციალურ მეცნიერებათა ფაკულტეტის დეკანთან, ქალბატონ ნანა ამირანაშვილთან ერთად, უნივერსიტეტის კანცლერის, ბატონ ვახტანგ წივწივაძის ფინანსური მხარდაჭერით, უკვე მეორედ განხორციელდა, ამჯერად მასობრივი კომუნიკაციის სადოქტორო საგანმანათლებლო პროგრამის ფარგლებში.
ტურს განსაკუთრებულ მნიშვნელობას სძენდა უნივერსიტეტის კანცლერის, ბატონ ვახტანგ წივწივაძისა და რექტორის, პროფესორ კახაბერ კორძაიას აქტიური ჩართულობა როგორც სამეცნიერო დისკუსიაში, ისე - შემეცნებით ღონისძიებებში.
მნიშვნელოვნად მიმაჩნია ის გარემოება, რომ ამ ტიპის აქტივობები, ერთი მხრივ, ახალგაზრდების სამეცნიერო უნარ-ჩვევების განვითარებას ემსახურება, ხოლო, მეორე მხრივ, საგანმანათლებლო მიმართულებითაც საინტერესოა.
არაფორმალურმა გარემომ დადებითად იმოქმედა ტურის მონაწილეებზე და მათი საერთო მოწონება დაიმსახურა,“ - აღნიშნა პროფესორმა, ნინო მინდიაშვილმა.
ისტორიის მეცნიერებათა დოქტორმა, CIU-ს ასოცირებულმა პროფესორმა, ქეთევან შოშიაშვილმა დამსწრე აუდიტორიას ისტორიული ქალაქის, სტამბულის შესახებ საინტერესო ცნობები გაუზიარა, ასევე, წარმოადგინა მოხსენება: „ქართული კათოლიკური ტაძარი სტამბოლში“.
პროფესორმა, ქეთევან შოშიაშვილმა XIX საუკუნეში მცხოვრები კათოლიკე ქართველების ბედსა და სტამბოლში კათოლიკური ტაძრის დაარსების მნიშვნელობაზე ისაუბრა.
მასობრივი კომუნიკაციის სადოქტორო საგანმანათლებლო პროგრამის ხელმძღვანელის, ხათუნა კაჭარავას მოხსენება მედიის დასავლურ და აღმოსავლურ მახასიათებლებს, მათ შორის მსგავსება-განსხვავებებს შეეხებოდა.
„აღმოსავლეთ-დასავლეთის ურთიერთობის საკითხი მარადიული თემაა, რომელიც დიდი სიმძაფრით არის წარმოდგენილი ფერით ორჰან ფამუქის შემოქმედებაში, განსაკუთრებით ორ პუბლიცისტურ კრებულში: „სტამბოლი“ და „სხვა ფერები“, - აღნიშნა პროფესორმა, ხათუნა კაჭარავამ.
თავის მოხსენებაში პროფესორ ხათუნა კაჭარავას თურქული პოსტმოდერნისტული ლიტერატურის წამყვანი მწერალ-რომანისტის, საკუთარ სამშობლოში ძალიან პოპულარული მწერლის, ევრაზიის ერთ-ერთი ყველაზე გამოჩენილი თანამედროვე რომანისტის, ლიტერატურის დარგში ნობელის პრემიის ლაურეატის - ორჰან ფამუქის დასახელებული წიგნების პრიზმაში აქვს განხილული თურქეთის ძლიერი და მრავალფეროვანი მედიალანდშაფტი, სხვადასხვა მედიასაშუალება და პლატფორმა, რომელიც, როგორც ადგილობრივ, ისე საერთაშორისო აუდიტორიას ემსახურება.
როგორც პროფესორმა, ხათუნა კაჭარავამ აღნიშნა, თურქეთში მედიაინდუსტრია, ძირითადად, კერძო საკუთრებაშია და წარმოდგენილია, როგორც ტრადიციული, ასევე ციფრული მედიასაშუალებების ნაზავის სახით.
შეხვედრას, ასევე, ესწრებოდნენ: კავკასიის საერთაშორისო უნივერსიტეტის კანცლერი ვახტანგ წივწივაძე, რექტორი კახაბერ კორძაია, კანცლერის მრჩეველი, CIU მულტიმედია ცენტრის ხელმძღვანელი ნინო ჭალაგანიძე და სოციალურ მეცნიერებათა ფაკულტეტის დეკანი ნანა ამირანაშვილი.
სამეცნიერო სემინარის დასრულების შემდეგ მონაწილეებს სერტიფიკატები გადაეცათ.
სოსო გაზდელიანი